ABERATSAK MAITASUNEAN:
“Ezin zarete izan bi nagusiren morroi” esan zigun pasa den asteko Ebanjelioak. Igande honetako irakurgaiek bi jabetza horiek nola egiaztatzen diren adierazten digute. Amos profetarenak eta, bereziki, Lukasen ebanjelioak mina ematen duen gai bat jorratzen dute: aberastasuna eta zuzentasunik eza.
Aberatsa eta Lazaroren parabolak ez du interpretazio librerik: gure jokabideak baditu bere ondorioak bai munduan, bai betiko bizitzan. Aberastasunei bihotza eskaintzeko arriskuan gaude beti, batez ere gaurko kontsumismoko kulturan. Aberats eta pobreen arteko muga lehen baino handiagoa da eta.
Egia esateko, denok gara aberatsak, Jainkoaren maitasun ugaria gure barnean baitaramagu eta altxor hori neurrigabekoa baita. Gu garena, guk daukaguna, Jainkoaren dohaina da eta dohain hauekin harreman zuzena eduki beharko genuke. Jainkoak…zertarako ematen digu hori guztia? Bere Erreinua eraikitzeko, hau da, mundua hobetzeko, Jainkoa eta gizakia maitatuz eta zerbituz.
"Badituzte Moises eta Profetak; entzun diezaietela". Jainkoak zuzentasunaren bidea erakusten digu beti. Jaunaren Hitzak, sakramentuak, manamenduak, elizako sozial doktrina emanez…baita begiak ere ikusteko, belarriak entzuteko eta eskuak laguntzeko.
“Bila ezazu zuzenbidea, erlijioa, sinesmena, maitasuna, iraupena, eztitasuna” esaten digu San Paulok. Atera gaitezen misiora, herrira, kaleetara Jainkoaren presentzia bizia senide behartsuenetan bilatuz.
.png)